Centro storico: Quartarieddu e li dichiarazioni ti lu Sinducu
Quartarieddu ieri sera stava tuttu malazzatu, toppu cuddu ca era tittu lu Sinducu,
cumparama Peu e ccuntrandu Cuchicchiu tissi: “speriamo cu no eti frusciu ti scopa nova ci noni no’ sapimu comu va spiccia!”
Cuchicchiu tutti mpressiunatu ci ddummandau: “Quartarie’ ma c’è eti ca sta struelichi, stasera?”
No ha 'ntisu cumparama Peu, lu sinducu? E’ dittu ca ava cchiutiri lu centru storucu. Allora toi sontu li quistioni: o no’ canosci comu stanu li cosi, opuramenti teni cimiculi pi’ la capu!
Ue’ Cuchi’, sienti a mei: Via Geofilo chiusa cu la culunnetta e ama ddiri ca l’annu mesa, cussì no’ passunu cchiu, ti ddani li cristiani (ma ncununu teni lu parcheggiu commutu commutu!).
Via Raschitieddu (lu soprannomi ti Gegnu Santacisaria) stai chiusa e lu risturanti “lu Cunnubbiu” è rumastu sulu e spasulatu anzi putimu tiri ca anveci ti Cunnubbiu è propria Ccattivatu!
La via ti Castieddu n’atra culunnetta e ca cussini la chiesa ti S. Anna e lu Pindinu ni’ lu putimi cotiri megghiu.
Cretu alla Chiesa Matri (la zzona ti Fiurenza) eti zona a traffucu limitatu prima totta la sciurnata e poi la bonanama ti Ton Angiulu feci fari ti li novi la sera alla matina alli otti, cussini ncununu, (zitti e stamini zitti) po’ ddormiri nzanta paci e cu la ticu totta se misi puru li crasti ti li fiuri ca moni annu siccati cu no' si mettunu li machini.
La strata longa e la strata ti la bonanama ti lu uardia Sardelli sulamenti pi' li residenti (no' sapimu ci a Misciagni o in Itaglia).
Via Albricci stai menza chiusa e ci uè va acchi cumparama Peppu ti li Flori a sciri all’appeti (lavori in costruzioni ca no’ si sapi quando spicciunu).
‘Ntra Sant’Anna vecchia no’ nci puè sciri ne ti nanzi (Via dei dormio, ne di cretu Via Tosches)
L’unaca strada ca puè fari, ntra lu centru storucu, cu la macana eti ti l’arcu ti la Porta Grandi allu Sitili, ti lu stili alla chiazza e poi Vico dei Caputu finu all’Ortuli.
Allora Cuchicchiu mia sienti a mmei: cu chiuti cumpletamenti lu centru storucu bastava nu cartellu stratali di divietu alla Porta Crandi. E allora aggiu pinzatu … No’ ue’ viti ca lu Sinducu cu totta sta tilivisioni ca sta veti, cu li profuchi ti l’Ungaria voli veramenti chiuti lu centru storicu comu sta fannu dammeru, a ddo’ stai vacanti cu nu pareti ca vai ti la Porta Crandi alla porta Novi poi alla Porta Picciula passando ti la scaledda ti Sant’Anna Nova?.
Sienti Cuchicchiu mia, ccumpagnimi a ddo’ Cilardu lu Scalaru alla via ti lu Macellu a ddo’ mmeru stava l’Arena ti Cici Nibbiu cussì mi ccattu ‘na scala ti quiddi ca si usunu pi’ la monda ti l’aulii.
Ca poi ci lu sinducu Peu voli chiuti lu Centru storico macari cu nu pareti iu mi priparu perceni la putea mia è propriu alla chiazza mmeru a ddo’ stai cssuprinuma Sarvatori.
Na bbona scala ti nu paru ti metri penzu ca abbasta e poi … a ci cretu rozzula!!!
E speriamu lu Ssignori cu ni’ ssista!!!
Quartarieddu
