Matonna ti li Càrmunu! (di Emanuele Castrignanò)
Rit. Matonna ti lu Càrmunu,
Matonna bedda mia,
prutieggi li villani,
scannàti ti fatia.
So’ fili com’all’atri,
no’ ti li puè scurdari
e tu ca si’ la Mamma,
lu sai com’ata fari.
Puru ca vannu fori
e fannu li villani,
ti facci so’ puliti,
ma caddi ‘ntra li mani.
S’àzunu già ti notti
ca no’ nc’è ‘llucisciutu
e fori va’ fatìunu
puru ca è chiuvùtu.
Sott’allu soli e jentu,
mai fermi nu mumentu,
la spadda scutursàta,
ca mai s’è rripusata.
Fatìunu comu pacci,
‘ssuppàti ti sutùri,
ormai, no’ si ‘rricòrdunu
cè sontu li tulùri.
Fatìunu intra e fori,
ti notti, giurnu e sera,
la vita ca sta tìrunu
è comu ‘na calèra.
E Tu, Matonna mia,
ca viti ciò ca fannu,
pirdònili ci a messa
vannu ‘na vot’all’annu.
E’ corpa ti la ventri
ca no’ va’ sempri chiena,
cancella li piccati
e puru ‘ncuna jastèma.
