Riprende a scrivere Cocu ti la 'Ngegna con la sua satira piccante e sottintesa.

Caro dirittori Ppino,

no t’era scriviri cchiui. Ma datosi ca no mi fai il cuntrattu di giornalisto e iu a quiri ti fronti no nci vau, ti sta scivu arretu, pirceni questa vota li cristiani so propria pacci e avi rascioni il consigliero Timastrotunatu.

Siccomu no mi hai fattu il cuntrattu, mi ho messo a fari il villano, ca dda no nc’è bisuegnu cu ti faci raccumandari ti nisciunu. Cu quiddi picca turnisi ca tinia, mi ho ccattatu un apicchio e sta vau fori: 35 euri li giurnu li mieni? E siccumu sai ca abbito intra alla Ngegna, coll’apicchiu essu sobbra al viale della Indipindenza. L’atru giurnu cce vesciu? Ca stavanu facendo la strata nova. Ti piensi versu cu vai allu cimiteru cu truevi li santi muerti nuestri? Mancu pi nnienti! Sta faciunu la strata nova, ca poi no nci stava brutta, quandu ggiri cu vai a Brindisi.

Mo ticu iu, è veru ca ti nna vanda amu puru cuminzari: ma no ti pari ca la sta fannu apposta? E tu m’ha capitu!

Addani passunu cristiani e dicunu: Uè sta fannu la strata nova. Ci inveci erunu fattu la strata ti Latianu addo nci stannu cchiu fuessi cca smaltu nterra no era statu megghiu? E siccomu no mi ni voglio pprofittari: ci cu quiddi sordi erunu ggiustatu pir isempiu la strata ca vau fori iu cu l’apicchiu ca ogne ggiurnu quandu tornu a casa aggia passari prima ti la binzina cu no ssia aggiu ìsgunfiata la rota, no era statu megghju?

Nci l’aggiu tittu puru a cumparama e cuddu mi ha ditto ca bisogna cu fannu la strata ti Brindisi ca ddà mo sta nna cosa mportanti, ca ddà passunu li mbolanzi, passunu li cristiuani cu vannu alla Oscià. Meh? E ccè moti so quisti? Ca iu no passu ogne matina cu l’apicchiu cu vau fori cretu all’Ampalata ca dda nci sono i cavvuerti coma un vulcano? È propri veru: a ci fatìa nna sarda (iu) a ci faci fatiari puru quattru!

Statibbuenu ca stasera vau propria ncazzatu. E sai pirceni? Ca l’atru ggiurnu era soltantu sgunfiatu la rota; osci anveci tegnu l’Apu ddo comparama Borrello ca mi sta cangia propria la rota. Li 35 euro ti osci a lau ti stu….

Statti bbuenu.

L’amicu tua Cocu ti ‘ntra la Ngegna