Cocu ti la 'Ngegna: ma a Misciagni pozzu tiri na recumaterna allu Campusantu?
Carissimo ddirittori,
come dicimu a Misciagni, falla pi tutti li muerti tua ci nni tieni e spiechimi a mmei ca no sono tecnologico quandu cagnu aggia sciri allu campusantu cu ppicciu nnu lampinu alli muerti mia. Mi hanno ditto ca il signor sindico ha fatto ordinanzi cu nni porta tutti cu iddu allu campusantu, iu anveci voglio l’ordidietru cu vau sulu pi li fatti mia, cu ccumpagnu mugghjierama, ca teni la razza longa e teni pricati muerti a ogne strata.
Annanzi tuttu: potiamo sciri a ddoi o noni? La pozzu ccumpagnari collapo e l’aggia spittari ti fori o pozzu trasiri puru iu o nci stai l’ordini lfabbetico?
E poi, mi ha ditto cumparama ca stasera ha passatu di casa cu la maschirina ca sta turnava ti lu nicozziu ti ddo Sergiu nanzi a Matirdommini ca ha ntisu ti questa cosa ca si po sciri allu campu santu collordine lfabbeticu. Me? E ci cumanda lu muertu o lu vivu? Mi spiecu: iu sontu Cocu ti la Ngegna (viventi) figghju ti Ciccillu (difuntu) ti Ntunietta la Cigghjiesi (difunta puru edda) e moglierima si chiama Zina di Nucciu ti la Mpalata, bbonanama ci nci caccia. Mo timmi ci cumanda? Zina cull’urtama lettura tilfabbetu o cumanda nonnama Ntunietta ca si chiamava Antonietta e quindi stai al principio del fabbeto? Ma Zina campa e Antonietta muriu mo faci teci anni…
Nzomma: è tuttu un casinu, pirceni cumparama mi a ditto ca si faci comu alla scola prima i vocali e poi i lettiri. Noni A, B, C, ma A, E, I, O, U e taccosi Cocu passa nanti a Ppinu, sempri ci cumandunu li vivi, mentri Antonietta (ca sarebbi nonna Ntunietta) passa nanti a tutti, puru ca lu sai ca nonnama era pi llu Rrei e quindi mai era vutatu pi li comunisti comu allu sinducu e mai puru pi li fascisti ca stannu ti costi e cumandaunu alli tiempi sua. A edda li piacia il generalimessi. Ma mi annu tittu ca la bonanima tel generali quand’era giovini e si nni sciu ti Misciagni era puru fimminaru, ma telle signore nobbili ti Roma e nonnama Ntunietta ca era cicurara ci vuei cu la carculava?
Ma no andiamo fori tel siminario e fammi sapiri come ama sciri allu campu santu: ca ci cumanda la bonanama ti nonnama Ntunietta ca si chiamava Antonietta pozzu puru passari ti la tomba ti la bbonanama ti sirda ca tinia nnu nomi rfabbeticu ca veni toppu ti cuddu di nonnama. E rricorditi comu tissi Totò ca li muerti si iutunu tra lloru: muertu unu e morta l’atra. E nnu lampinu no ssi neca a nisciunu, mancu alli vivi…
Fammi sapiri, possibilmenti prestu taccosì ncelo spieco a moglierica ca intanto si sta ripassa il fabbeto cunossia stai un parenti ca si chiamava cu nnu nomi ca ncumenza prima tella lettera A. Nossisamai!
Un saluto cordiali (noni lu liquori ca nni mbiviumu ti ssurdatu!)
Coco ti la Ngegna
