Attezione alle previsioni ... (di Quartarieddu).
Sta cchiovi e la paura stai, stai!
Genuva, Roma, lu cicaloni a Catania! E a Misciagni? Peppu Messi è cuminzatu cu scrivi “sinducu … e l’allarmi pi’ Misciagni … mai? Sempri alla Rota ti la furtuna ama spirari?
Allora lu Sinducu è pinzatu: “No ue’ viti ca ama cappari arretu la 'nfurrata ti Mariu Scanusciutu!” E chiamatu Luvici ed è dittu: Fuci allu Canali ti la Calima viti ci faci mossa. Poi è chiamatu totta l’unità ti crisi sobbra alla Cumuni cu stannu tutti pronti pi’ la bisogna”.
E allora fuci ti qua … fuci ti ddani Luvici cu la macana ti tonna Samuela vici puru edda a uardari lu canali a squatrari casu mai l’aqua ti lu canali facìa mossa, … poi cu lu talifuninu chiama l’amici ti La Torri e ddummanda dammeru ce sta succeti!
Lu Sinducu tici ca è avutu l’allarmi ti Brindisi e se datu subbutu ti fari cu l’unità ti crisi, li ‘ngigneri ti l’ufficiu tecnucu, li uardi, quiddi ca tannu na manu pi’ la pulizia ti li palazzi e ti li strati, tutti pronti e ncununu cu li cambali, atri cu l’anfibbi e pinsati ca puru allu Sinducu hannu purtati nu paru ti calosci ca moni non si nn’usunu cchiui.
Tuttu prontu … !
Sittatu sobbra la seggia, ‘ncununu uarda ‘ncielu, Luvici a tisposizioni …. E l’ori passunu e no’ succeti nienti … e passa tutta la sciurnata ti Sabbatu … e no’ succeti nienti. Mmeru a menzatia … na ‘nziddera ca Papa Ugegnu ticia “bbona pi l’animi ti lu Purgatoriu”! e poi cchiu nienzi.
Anzi alla sera n’ammu cututa na luna ca la bonanama ti nonnama la chiamava ti Quintatecima … !
E osci nu soli alla crandi e stasera amu cuminzatu cu fistiggiamu San Martinu ‘ntra San’Anna nova … basciu allu Pindinu … cu pettuli, gialletti, castagni, pagnotti e na ‘nfurrata ti vinu ca ci era stata acqua ca sta spittaumu n’erama essiri tutti nfucati.
Aggiu pinsatu: “sapi ce hannu tittu tutti qiddi ti l’unità ti crisi. Eppuru lu Sinducu è avutu lu messaggiu ti Brindisi cu stannu tuttu all’erta”.
'Na mali lengua è fattu sapiri ca jappa jappa lu sindacatu la cosa se le rragiunata e no’ voli cerca mancu lu straordinariu pi sti toi sciurnati persi.
Ma ncununu è dittu (e lu nomi no’ si po’ diri): “e ce ama ffari fino alla stagioni n’ama tini’ stu Sinducu”. “Menu mali ca no è pinzatu cu vendi capareddi … ci noni li piccinni a Misciagni nascìunu tutti senza capu!”
Quartarieddu
