Quartarieddu no’ sapi ci ava vutari: Ninicchiu opuramenti Peu-Peu!
Nusterza matina, ‘ntra san Ciprianu, aggiu ‘ncuntratu cumparama Cuchicchiu ca me ddummadatu ce si tici ti l’ilizioni alla Cumuni ca s’anna fari auannu ‘ntra lu mesi ti Masciu.
Aggiu rispuestu subbutu: “’Nna parola, cumpa! Ca quani no’ si ni sta’ capesci cchiù nienti. Prima erunu sei e mo’ annu ddivintatu cincu quiri ca volunu ddiventunu Sinducu ti Misciagni e pirdenni ntra partiti, cristiani e quarchi zucculoni tutti quanti si ccocchiunu e si scocchiunu. Ti li partiti no’ si ni capesci la tretta e nc’eti puru ci cosi e scosi senza cu’ perdi tiempu!
Viti, tantu cu ti ni ticu una, lu ‘Nurevuli ca alli tiempi mia erunu chiamatu ‘Ntunucciu e moni cu si tanno nu certu cuntegnu lu chiamunu Tony, beh, Cuchicchiu mia, propria ti’Ntunucciu è partutu tuttu stu scuncignu!
Ntunucciu è chiamatu Peu-peu e nc’è dittu: “viti ca tuni a essiri lu sinducu nuevu. Amma ggiustari Misciagni nuestru, ca quani li fitienti, ca no’ putimi tiri ci sontu pi’ bbona crianza, annu fattu ti tannu mancu la crandini cussini. Ama ggiustari li strati e li bacchittuni, li luci, la villa comunali ca ni’ la sta fannu siccari, lu campusantu ca ci ncununu trasi no’ nci veni propria propria spilu cu mmori”.
Cussì Peu-peu, nu mesi prima ti Natali, pigghiandu alla sicurduna tutti quanti è dittu alli misciagnisi: “Vistu comu stannu li cosi e cu la binitizioni ti cumparama lu ‘Nurevuli ‘Ntunucciu ti la Mattaredda, aggia essiri iu lu sinducu nuevu”!!!
Eccuti ca ‘ntra li Pidini (ca prima armenu cuannu erunu cumunisti ‘ncununa la ‘ndrizzaunu) è nnatu nnu rivuetu, s’è ‘ncazzatu puru Franchucchiu ca avi cincu anni ca no’ tteni ne arti, ne parti, no’ ni parlamu ti Tamianu, Cusimucciu (ca nu’ tiempu li chiamaunu li Santi Mietici comu quiddi ca stannu a Oria) e Firdinandu ca si sta’ priparava jappa-jappa ci sa nci stava nu pusticieddu puru pi iddu!
E toppu tanti cirimogni ti l’atra vanna è ssutu n’ammiragliu ca tutti quanti lu volunu a canosciri ma ca forsi ancora è rumastu sobbra a ‘ncuna navi! Mo’ ca se mmisa la putea nanzi la villa alla strata ti la stazioni, ci sapi ci lu vitimu sanu, sanu!
Poi Tonna Sabrina no’ sapimu ci stai cu cumpà Ginu lu francaviddesi e cu Rafeli lu popputu, puru ci ama ddiri li cosi ggiusti cumpà Ginu le rapprisintata a Castieddu a ddo’ nc’erunu tanti tanti cristiani (ma ti Misciagni picca!). E ‘nc’è puru Tanilu ti li cincu steddi ca a me mi sembra ca a Misciagni picca anna luccicari ca siccomu lu tiempu e trubbu, li nuvegghi li steddi li fannu spariri.
E poi cumparama Ninicchiu, ca ava essiri lu capubbanda ti la sinistra (alla veramente puru ti ncununu ca eti nu sinistru).
E allora Cuchicchiu mia lu tilemma eti seriu perceni, quiddi ca ponnu ddivintari Sinducu sontu o Ninicchiu o Peu-peu e tutti toi, uarda la matosca sontu tutti e ddoi mietici, comu era la bonanama ti Brunu Vorpi!
Mo’ la cosa è seria: ci ama vutari? Certu ci vutamu Ninicchiu è nu bbuenu cristianu sempri a disposizioni, pi li misciagnisi facìa tuttu sia a Misciagni ca a San Pietru alli spitali e no si ni primava ci eti, Lunitia, Tumenaca o lu ggiurnu ti Natali. Ticunu ca stai alla pinzioni e ci eti veru lu fattu, amu persu n’atru picca ti Spitali a Misciagni!
Ma puru Peu-Peu è mietucu, cumpagnoni, sempri cu tutti a qualsiasi ora ti lu ggiurnu e ti la notti.
Allora Cuchicchiu mia è propriu nu prublema.
Cuchicchiu era ‘ntisu tuttu tuttu e sta' mmuscava nu picca, poi mentri sta parlava veddi ca Quartarieddu era pigghiatu la dicisioni e sintìu tiri:
Cuchicchiu mia, facimu na cosa, Ninicchiu lu votu iu, e Peu-Peu lu vueti tuni. L’atri (Sabrina, Migliu, Ntnucciu lu calabresi) no’ mi sembruni cipoddi ca uscunu! N'atra vota poi pinzamu pu a lloru!
Certu ca l’urtimi vinti anni n’annu pigghiati sempri pi fessa e n’annu scaffatu ti pierni ca no’ ti ticu e no’ ti contu.
Sa’ na cosa? sta pinzava ca ci sbagliamu puru stavota armenu, o Ninicchiu o Peu-Peu anzicché pierni ce n’anna scattirisciari? Mali ma n’ava sciri … nu paru ti supposti e comu si tici …, armenu ci no’ mbivi sciacqui!
Quartarieddu
