Quartarieddu e l'ilizioni pi' la Cumuni!

Matonna mia ce rivuetu ‘ntra Misciagni! A na simana ti li votazioni ni l’annu fatti quantu to’ visazzi!

E lu uai è statu pi mmei! Nisciunu mi canuscìa e ca quandu s’annu fatti li listi … nisciuni è vinutu cu mi ddumanda: Quartarie’ ue stai ntra la lista cu nnui?

Tantu oramai no’ eti comu a pprima e li partiti o alla manu tretta o a mancina ci si ni fotti! So’ tutti bbueni.

Ue Cuchicchiu mia ce mi sta uardi?

E Cuchicchiu: “no’ sta capescu, propria tuni ca a tittu a tutti ca la pulitaca eti nu mmiscu e nu burdellu ieri vulutu scindi ‘ntra ncuna lista! Cu faci cce cosa?, lu Sinducu, l’Assessori? o lu semplici villanzinu ca vai alla Cumuni cu aza la manu?

Noni, noni Cuchicchiu mia! No’ è custu lu mutivu! Ce mi ni prema ti la Cumuni! Lu fattu eti ca s’annu prisintati pi’ sitici posti na cosa comu trecientu candidati, mancu li caribaldini cussini! E iu mancu ntra la lista!

E Cuchicchiu: n’atra vota, ma fa’ capiri stu fattu ca vulivi cu stai ntra la lista e no’ ti ni friechi nienzi ti la Cumuni.

Sì propria cussini: aggiu vistu li listi e tornu a ddiri: “So trecient!” e mmienzu nci stai, cugginama, cumparama Tappa-tappa, cummarama Maria la scesciula, l’avvucatu ca mi ssuggittai mofallannu cu vencu la causa cu mugghierama, quedda ca mi faci li carti pi’ li tassi, ci mi faci l’assicurazioni pi la macana, Carminucciu uscapagghiara, lu nipoti ti Bibbi ti cicora, Cici ti lu sindacatu e puru cussuprinuma Ntunucciu.

Mi tici tuni, Cuchicchiu mia, a ci aggia vutari?.

Pirdenni ci m’era misu ntra nna lista era tittu a tutti ca stava puru iu, anzi no’ era tittu propria nienzi tantu sapiunu ca stava ntra na lista! E poi iu no’ mmancu mi scià vutava!

Na cosa, ti sicuru, mi tuccava: … armenu, tutti sti scapuliesciungi no’ mi cardaunu! 

Quartarieddu