Quartarieddu e li ritratti ti li candidati!

No’ mi lu critìa propria ca la pulitaca a Misciagni facìa veramenti miraculi.

Mancu alli tiempi ti Sant’Eleuteriu cussini. St’urtimi giurni ti campagna elettorali a do’ ti giravi giravi ti vitivi manifesti, santilli cu li candidati alla Cumuni, carti e carticieddi ‘ntra la buca ti la posta.

Ma la maraviglia mia è stata quandu aggiu visti li ritratti no’ tantu ti ci voli ddiventa Sinducu ma ti tutti quiddi trecienti ca voluni ‘nchianunu cu cuvernunu Misciagni.

Ritratti ca sembrunu cosi ti lussu … li femmini tutti ‘mpumatati ca propria tannu, tannu annu ssutu ti lu parrucchieri, e forsi prima cu si fannu lu ritrattu annu sciutu puru a ddo’ Franca ti li massaggi cu si llevunu ncuna cosa confia ca tiniunu sotta alli uecchi.

Ma la tecnaca ti moni è totta n’atra cosa. A ddo’ li figghi ti Luiginu, cuddu ca teni la putea nanzi a ddo’ era lu campu spurtivu ci vai, mo’ ca s’annu fatta la manu, allu ritrattu ti llevunu ‘na ticina t’anni! No’ nc’è bisuegnu cu ti mmuti, cu ti mitti lu fardi ‘nfacci.

Ci pensunu tuttu loro e nu ritrattu no’ costa cchiui ti 10 euru.

Pirdenni ‘ntra Misciagni quiddi ca volunu vannu alla Cumuni annu sciutu a ddo’ li figghi ti Luiginu! Uardati l’avvucati femmini comu annu vinuti sobbra li manifesti, belli, ngraziati e ngarbati!

Ma lu finomenu no’ è statu sulu pi li femmini ca perceni puru li masculi sannu ssuppatu la fedda. Beh! Sciati alla strata ti lavari e uardati bbuenu percé cuparama …, ‘ntra la vitrina! è ssutu propria bbedu, na’ facci ca sembra totta nova, cuntinuta e tuttu! … pari nu vagnuncieddu ti na vintina t’annu, comu ticìa mugghierama … nu giovini zitu! Bravu lu cumpari mia!

Cussini l’atra matina quandi ccuntrai cumparama Peppu nci ddummandai a ddo’ sta vai? M’aggia scià fari lu ritrattu pi’ la patenti nova, mi rispundiu … e iu … vani a ddo’ li figghi ti Luiginu. Cussì feci. Beh forsi no’ lu crititi ,nce livati tuttu lu cunfiori ca tinìa nanzi li uecchi allu puntu tali ca ti settanta anni simbrava ti na trintina e lu tuttori nc’è dittu. Ue’ Pe’ a ci ue’ futti? Va cangiti lu ritrattu ca ci noni la patenti ti la suenni!

Ci nc’era nu tuttori cu visitava li candidati forsi sintiumu bbueni voti tiri: Ue’ … ma a ci vuliti futtiti. Cu l’ummutu no’ si n’enchiunu csterni!

E comu santu sia sia, a tutti vi ticu “cu vi vegna bbona” E pi nnui a cci cretu rozzula!!!

Quartarieddu