Alla chiazza cuperta ... "amu vintu"! (Quartarieddu)

Ieri sera aggiu passatu ti la chiazza cuperta comu si chiamava ‘na vota e non c’era n’anama.

Armenu, cussì simbrava. Palazzuelu era chiusu, li vagnuni, ti la vanda ti sobbra, erunu spicciatu cu fannu li fatti loru e si n’erunu sciuti a casa, Fabbrizziu a ddo’ si mbevi vinu sta chiutìa e senza cu la purtamu alla longa no’ erunu rumasti mancu curu museu ti luci ca erunu ppisu pi’ Natali!

Trasu ntra la chiazza totta all’uscuru e mi sentu tuccari … Na’ marammei! … ci eti? Tissi cu nu filu ti voci! Non c’era nisciunu … mi vutai e nienzi … e allu mentri ca mi ni sta scìa mi sentu arretu tuzzari!

Allora mi feci curaggiu, assii lu piettu ti fori e dissi … ci sinti ...  iessi annanzi, ... fatti a canosciri!

E mi pigghiai 'na coccia … perceni totta a na vota sintii ca sta ritiunu a tremulaterra!

Nui simu! … no’ ni sta canusci? … ah, ah, ah, nui simu!

No’ si vitia nienzi, mi mesi a contrastu e ti quedda filatora ti luci ca vinìa ti lu lampioni ‘nanzi a Massimu ti lu putichinu, vesciu tre ombri … ca mi simbraunu a canosciri. Mi nvicinu e … non ci putìa cretiri … eruno … Bigliuncinu, Betta e Alfonsu ti Betta e nu picca cchiù luntanu Pinu ti Totu e pi … urtumu Tamianu ti Mbrioschi!

M’assiu ti ntra lu cori … cu dicu: buttati lu pallinu … ma ce sta faciti quàni? No Jerava a stari allu sciardinu, alla via ti Brindisi?

Erama a stari! Ma mo’ … stamu qquani, … pirdenni tissi Alfonsu!

E ce sta facìti?

Osci nienti e n’hannu pututu prisintari, topu tanta fatìa perceni amu lettu lu giurnali ti Cocu ti Sparacinu ca annu risoltu la quistioni ti la chiazza cuperta! Propria cussini!

E subbutu Bigliuncinu … Amu vintu, tantu c’ammu fattu ca amu vintu. Ce t’eti stu prucressu, li nicozzi crandi, li minchialiri ti li firmi?

La chiazza cuperta ava rristari quedda ti na’ vota, la chiazza ti Bbigliuncinu, ti Betta, ti Alfonsu ti Betta, ti li Mbrioschi, ti Lacanà, … ti Cocu ti la fami, ti Fernandu la zzoppa, ti Pinu ti Totu, ti Manueli tinghi-tinghi! Puntu e basta!

E mo’ putimu rifinari! Percé lu Sinducu ca tinimu moni, ca aggiu tittu a cumparama Peppu cu lu chiamamu Peu-Peu è fattu bbuenu cu faci turnari alla chiazza li cicori, l’ampasciuli, li rapicauli e puru li spunzali! Puntu!

Amu vintu! Amu Vintu! No’ nda retta a Nicola ’51 ca cuddu porta pulici pi la capu! Cu la chiazza cuperta anna spariri tutti li funtanoddi ca vendunu ntra casa e ava spariri cuddu ca Cici ti lu sindacatu chiama “marcatu amicu” ca vendunu li cosi ti casa loro cumpresi li banani ca m’anna diri a quali arvulu ti li mammi loru l’annu scìa ccueti!

"Amu vintu e mo’ putimi sciri a ddo’ cumparama Rammazzu pi nu belli bicchieri ti vino, a ddo’ cumparama Pisieddu pi’ na bella brasciola, e ddo’ Rrigginella pi nu sicondu bicchieri ti vinu. E piccatu ca chiutera lu barra ti lu nunnu Cici ca ci noni n’erumu pigghiatu puru nu cafei Borghetti"!

Mo’ stamu tutti cuntenti e quantu cumenzunu, quiddi ca sannu pigghiatu lu postu nuestru cu vendunu cicori e cicureddi, marangi, muliddi e peri nati suli, rricurdativi ca stamu puru nui … Biglincinu e Alfonsu ti Betta capubbanda!!!

Vagnù, comu è successu lu fattu ti ‘stanotti, cussini vi l’aggiu cuntatu

Quartarieddu