Carnuvali (di Carmelo Colelli)
Avi ti stamatina, ca ‘ntra Misciagni sta succeti nu rrivuetu,
cristiani ca vanno e venunu ti casa ti ddu puvirieddu, mietici ti tutti li razzi e ti tutti li paisi, sta cercunu cu llu iutunu.
Du cristianu se sintutu brutto npena se azatu, li forzi no llu sta ncumpagnaunu, la mugghieri ca le vistu ccussini subbutu nce fatti sei ovi sbattuti e nce li fatti ‘mbeviri, ma si vitia ti nfacci ca no stava bbuenu, stava pallutu pallutu, parlava picca e chianu chianu.
A menzatia li vicini ti casa, tutti bbueni ti cori, a ci ‘nce purtato la bella pignata ti pasuli, a ci ’nce purtatu na bella patella ti purpetti ti pasturedda belli cauti cauti, a ci ‘nce purtatu brasciole nturticchiati cu ll’azza ca erunu chiu grandi ti nnu pugnu ti masculu, a ci ‘nce purtatu sazizza rrustuta, fina e grossa, nu cristanu ca abbata all’angulu, nce purtatu to tamiggiani ti vinu, una ti marvasia nera e n’atra ti liatucu, cu si rripigghia picca picca.
Iddu se mangiati tutti sti cosi, l’annu vistu nu picca chiù rrisuluto e dittu puru qualchi parola ma toppu nnu picca se mmalazzatu arretu.
La mugghieri ca le vistu totta nna vota ccussini se misa a critari e tutti li cristani annu currutu cu vetunu nc’era sussesu.
Tutti sannu tatu da fari, ci e sciutu a Brindisi cu chiama lu megghiù tuttori, ci e sciuto a Lecce e ci e sciutu nfina a Bari cu va pigghia lu megghiu primariu ti lu spitali.
Osci toppu mangiari nce statu lu cunsultu ti sei mietici.
Lu primu mietucu e dittu: “Non eti cosa di tenerlo in questa casa, bisogna portarlo fuori, il moribondo deve prendere aria, devi respirari l’aria ti lu paisi, a va vetiri la villa e la chiazza, a va mangiari all’apiertu ncu nna cosa e devi beri molto”
Lu secondu mietucu e dittu: “Esimiu collega sono t’accordo col tuo parere pero nui mietici prima ti tari da mangiari allu malatu tobbiamo assaggiari ogni cosa per vitere se la robba e bbuona e non puote fargli mali alla pancia.”
L’atri mietici subbutu s’annu truvati t’accordo.
Quandu la mugghieri e ‘ntisu ca nd’erunu a ppurtari Carnuvali, lu maruitu sua, se misa a chiangiri e insieme a edda sannu misi a chiangiri tutti li parienti e li vicini ti casa.
Subbutu annu mpruntatu nu trainu cu nnu bellu cavaddu mansuetu, hannu piggghiatu Carnuvali cu tuttu lu liettu e l’annu caricatu sobbra, ti costi a iddu li mietici e l’infirmieri, subbutu nc’annu puntatu na flebbu ti ottavianu e chianu chianu hannu vistu ca Carnuvali se risullivatu.
Strata strata li cristiani ca lu canuscinu a ci chiù nci tava cosi ti mangiari, li mietici ssaggiaunu e faciunu mangiari Carnuvali, furnuta la prima flubbu ti teci litri nci annu ttaccata n’atra, stavota ti primitivu.
Cu llu fannu stari alliegru masculi e femmini sannu misi a sunari, a ballari, a cantari, iddu se fattu bellu russu russo, si vitia ca li sta piacia.
E truvati li forzi e e dittu:
“Non mi nni fottu nienti ca eti l’urtumu giurnu mia ma lu vogghiui vivu cu lla gioia e l’alligria e non c’eti nienti chiù megghiu ti sta bella cumpagnia.”
Carmelo Colelli
09 Febbraio 2016
