Quartarieddu: nu cunsigliu pi’ Migliu ca pitta … allu Parcu!.

Na vota, subbutu toppu la uerra, comu mi tissi la bonanama ti l’attani ti cumparama Peppu, sobbra alla Cumuni cumandava Fitiricu ti Parmodda

ca ‘nsiemi a Zinbulettu uardaunu li carti bullati e ti ticìunu ci putivi o noni frabbicari, comu sifabbricava tannu: sala cammara, cucina e sottascala.

Poi lu tiempu è passatu ed è nchianata sobbra alla Cumuni na’ Parmodda, (sempri ‘ntra l’Uffiggi do’ si fabbraca), stavota femmana, ca fuci, tìci, chiama, crita e pretaca cu Pumpeu ca le cussì striminutu ca lu putimu chiamari, ormai, comu la bonanama ti Fitiricu, Pumpeu ti Parmodda!

Lu cusibbisi ti sta lettara eti, tantu cu la ticimu ggiusta, ca mi servi na raccumandazioni pi’ Migliu, (noni Llarcioni paci all’anama sua) ma Migliu ca sta pitta biancu e neru li casi ti li cuntatini, comu ticunu a Latianu ‘ncocchia allu Parcu.

Aggiu ‘ntisu ca voli metti sotta a tutti li disegni ca sta ‘nquacina, nu pruverbiu misciagnesi e la cosa me ppiaciuta assai percéni li provierbi sontu veramenti l’anama e iu ticu lu cori ti tutti nui, ma cu la quistioni ca li pruverbi no sai ci sontu veramenti ti Misciagni aggiu pinzatu: li pruverbi ca sienti a Misciagni li sienti puru mmocca alli Ddianisi e alli Urchiulani e sannu persi ‘nziemi allu mesi ti poi e all’annu ti mai!

E allora aggiu pinzatu cu mittimu sotta a nu ddisegnu nu “comu si ticìa” ‘na vota (e cu la ticu totta comu lu ticìa la ‘Ngiorgi[1]) ca eti veramenti misciagnesi.

Allora ce ni tici Migliu ci scrivi:

“Cc’è ni ni futtimu ca no’ vindimu cafei, basta … li chicchiri cu stannu ppisi!”

Custu lu scrivimu cu cori rrivirenti pinzandu a tutti li sindici e l’assissori ca Misciagni è tinùtu toppu la siconda uerra mundiali e percèni, scrivimu alla veramenti, lu veru ti tutti quiri ca annu passatu ti la Cumuni!

Facitimu ssapiri!

Poi vulìa cu ticu all’Assissori Parmodda: scusa ci ti chiamu cussìni.Prima li Parmi li chiavaunu tutti Parmodda ca poi ci nci pienzi buenu no’ eti bruttu comu nomi!

E n’atra cosa: ci crammatina Pumpeu nuestru ‘nchiana li scali ti la Cumuni e crìta: “vagnu’ atu vistu Parmodda” iu no’ c’entru nienzi!

Quartarieddu

[1] Ti la ‘Ngiorgi putiti dummandari allu prufissori Marcellu Ignoni sobbra a Facibbuk ca iddù sapi lu fattu!