L’estati misciagnesi (Quartarieddu)
Aggiu ‘ntisu ca eti tuttu prontu. Puru auannu n’amma scaquaraggiari nu picca ti turnisi cu ni divirtimu totta l’istati. Balli, zzumpi, risi, 'ntra nu quartu ti spumuni e ‘ncuna menza pagnotta!
‘Na cosa no’ capescu … ma no’ sta falliumu sobbra la Cumuni? Armenu cussini tici cumparama Peu! … e allori iu mi ticu … ma a ddo’ sta essunu tutti sti sordi.
Aggiu lettu ca li Brundabbasciu anna ‘viri la billezza ti quindicimila pappacalli cu n’enchiunu ‘na sirata, no’ di canzoni ma ti striepiti, criti e ci cchiu ni teni cchiu ni metti!
E allora comu la mittimu? … ni mbrogghiunu ogni giurnu a poi comu si tici … li sordi stannu?
E propria ieri sera aggiu ccuntratu cu cumparama Cuchicchiu nanzi ddo’ ‘Ngilinu bbasciu alla Porta Crandi mmeru alla villa! Era mangiatu favi e m’era scià pigghiata ‘na cazzosa bella fresca fresca ci sa’ putìa diciriri.
E aggiu tittu … Ue’ Cuchi’ … tu ca sai tuttu ti li futtisteri misciagnisi … a ddo’ sta pigghiunu tutti sti sordi cu fannu la festa? ‘Nci stai ncununu comu si tici, llentamarenghi ca sciogi nu’ picca ti uegghiu opuramenti li sordi stannu e ticunu sempri ca no’ nci ni stannu?
Lu fattu eti, Quartarieddu mia, mi tissi Cuchicchiu ca puru ci no’ tieni sordi … li cosi la ffari. Lu populu avi bbisuegnu ogni tantu cu si ddifresca, cu sbaria e pirdenni la nicissitati ti faci fari lu ‘stati misciagnesi.
E allora cu cuddi ca cchiu o menu ci stai, eccuti ca nu teci mila euru vannu allu Cumitati Festi Patrunali, pi la festa ti la Matonna, milli euri a quiri ca si vestuni cu na croci rossa mpiettu ca sembra ca’ è turnatu Carnuvali, n’atra cusaredda a quiddi ca fannu a vetiri “comu si zzumpa, comu si balla, comu si tira lu peti alla palla”.
E ppi’ quantu ricuarda li sordi … stannu, stannu … Allora amu misu nu ioschu bbasciu alla Porta Crandi e li cristiani ‘ncuna cusaredda la tannu, poi ggira “lu scrittu” ti la Matonna, ca sontu l’offerti ca ti tannu casa casa e n’cun’atru cintesunu si ricogghi. Poi lu cruessu trasi ti tutti li cummircianti ti quiri ca venduni li pagnotti, alli bar e a quiri ca vendunu nuceddi!
Toppu sti paroli comu ci m’era vinutu nu ‘nzurtu allu cori m’aggiu giratu a Cuchicchiu e aggiu tittu: No’ ‘nci creu e giacca, mo’ chiamamu ?Ngilinu e ddummandamu.
M’aggiu giratu e aggiu tittu: “’Ngili’, ieni quani, e dimmi: quantu ha tatu pi’ l’istati misciagnesi’
Ngilinu s’è nvicinatu e seriu, seriu ‘nni rispundiu: Mancu ‘na magghia! E ci vuliti vi lu spiecu chianu chianu!
La Cumuni avà pinzari alli misciagnisi e la va fa’ divertiri, cussì tutti quanti no’ pensunu alla Tari, all’Imu e all’Isis e li ccatta e vvindi comu a mmei fatìunu ‘nu picca e si paiunu tutti li tassi ca avimu tuttu l’annu!
Comu mancu na maggia? ‘nci tissi, iu ca so’ amicu tilu sinducu aggiu duvutu a dari 50 carmulucci e tuni mancu na magghia?
Eh, eh, propria cussini eti la vita! ?mo’ facitimi trasiri ca aggia priparava na’ stufa ti ggilati ti limoni!
Tissi a Cuchicchiu: ma veramenti tutti li commercianti no’ dannu nna magghia? Cuchicchiu cu la capu ca si sbasciava feci a capiri ca cussì era e mentri iu lu sta uardava cu nu picca ti trasbustu Ngilinu spiandu ti lu farcuncieddu ni critau:
Quartarie’ lu sai comu si tici a Misciagni? Cati Piru ca … ti mangiu! E ci moni annu capatu e nci stai nu Piru perché no’ mi lu pozzu fottiri … alla truscia!!!
Poi, prima cu chiuti lu farconi tissi ‘ncora: Quartarie’, Cuchi’ e ci lu vititi … salutatimi cussuprinama Maurizio, lu figghiu ti cumparama Cillu ca cu la ticu totta nziemi a mmei … nne’ mmarcati supali!
Quartarieddu
