E’ Natale: “più sagna per tutti” (di Cocu ti la chiazza).
Riceviamo e volentieri pubblichiamo un'altra nota del nostro collaboratore Cocu ti la chiazza e questa volta prendendo a pretesto una serrata dialettica tra colleghi della stampa ci dice: E' Natale: "più sagna per tutti"! Buon divertimento!
Carissomo ddirittori,
toppo la mia lettera ca ti ho mandato pillammaculata, manco un crazie; manco una busta ti pasta e una boatta di pummitori, ca puru mi bissognano. Abbiamo rimasti ca tu vuoi fare il “Libbro ti Cocu”, ma turnisi o maccarruni, quani no ssi nni vetunu. E già ca tu poi mi piggli pi lu nasu, ca mi tici ca nossono cronista e ca no mi puoi paiari.
Mo mi anno titto ca si stanno pigghiando a cuerpi di fiorelli – ca poi ntra nnoi ca no siamo cronisti sono cuerpi ti mazza, comu quiddi ca mi minava zziuma Chiccu – pi nna spasa di sagna due crunisti ti Misciagni.
Cumparama Nzinu ca tieni internetto mi ha cuntato ca uno tici ca la sagna si mangia la matina, latru tici ca si mangia la sera. Iu sacciu ca nonna Cuncittina facia la sagna li ggiurni cumandati. Quando rrivava Natali si priparava tanti giurni prima. Ti l’antiviggillia si azava prestu e trumpava la pasta cu farina e sei ovi.
Poi sobbrallu tavulieri stindia la pasta e la facia suttili suttili. Ci era sciroccu no nn’iera sciri parlandu, perché la pasta mmiscava allu tavulieri e assivoglia cu mitti farina! Quando anveci era tramontana, la pasta si stindia sola sola e siccava subbutu. Poi mittia l’acqua a ferviri sobbr’allu fuecu e facia lu mpastu cu la carni macinata passata allu sucu e la ricotta.
Quando la pasta l’era cacciata ti ntra l’acqua firvuta e l’era passata sobbra alla mappina, tannu ncuminzaunu cu enchiunu la patella e la sagna criscia, ca poi ncera ci nci mittia la murtatella di ciucciu e li purpetti e l’ovu allessu. Ci la sagna era puviredda, invece, soltanto nnu picca di ricotta, lu casu crattatu e priavi Ddiu cu rria Natali, cu no nvitaumu assai parienti ca ccussini mi tuccava n’atru piattu ti sagna.
Ma mo timmi: i toi cullechi ti ssignuria, ca sei cronista puru tuni, ti quali sagna sta parlaunu? Iu puramenti no spettu a ttei cu mmi nnuci la sagna, ca ti Natali stau nvitatu ddo frauma e mugghierima ha ditto ca nui purtamu lu secondu. Quindi, ci canatama faci sagna, nui facimu brascioli e tuni statti a casa tua.
Ca iu no ti nvitu, ca ci vuei, porta mugghierata a mangiari al ristoranti, caliti mpota e paja. E no ddiri al cammarieru: “Che cosa nni stai portando?”. Ca a Natali si mangia a pastu fissu com’alli ssurdati. Ci vuei la sagna, sai addoni à tuzzari, a statti attientu…
Tu attanto mandami una lettera. Ci nci mitti nna cincu euri nommioffendo, pirceni tevo ccattari la carni pinnatali. Forzi ti scrivu arretu cu ti fazzu l’aucurio di Natali!
Cocu
