La Festa del Carciofo di Emanuele Castrignanò

Gira e vota ‘ntra Misciagni
ca nc’è picca cu ti lagni,
sempri tutti a muvimentu
fermi mai pi’ ‘nu mumentu.

Pur’auànnu ‘n santa paci
‘n’atra festa si sta faci,
si fisteggia lu carciòfu 
ca mi bbìnchiu e mi strafòcu.

E’ ‘na festa ‘n grandi stili
pìgghia strati e lu Sitili,
suèni, ardùri e allicrìa
ti ddivièrti ‘n cumpagnìa.

Strati e chiazzi prufumàti
ti carciofi cucinati,
a frittata o parmigiana,
nati ‘ntra sta terra sana.

A brutèttu, crutu o frittu
ti lu mangi zittu zittu,
ci lu spingi cu lu vinu
ti nni futti ‘nu traìnu.

Nnuminàtu è stu paisi
pi’ sti chianti tisi tisi,
ti villani curtivàti,
già alli tiempi ti li tati.

Ci no’ veni la scilàzza
pi’ li strati o pi’ la chiazza
viti mazzi priparàti
ti carciofi llattumàti.

furastieri e paisani
a frazzàti cu li mani,
si pruvvètun’ogni vota
can ci sta’ ‘na bella ccòta.

Si cccumènza cu li cardi 
t’innamùri cu li uàrdi,
ddilissàti e po’ ‘nfurnati
ti li faci rracanàti.

Lu carciòfu, è risapùtu,
ti ‘lluntàna lu chiaùtu,
teni tanti prupritàti
e lu fièrru a quantitàti.

Pi’ li miètici o spiziàli
ti nna fòttiri a quintali,
e, maisia, no’ t’ha scurdàri
ca sott’ogliu ti l’ha fari,

hà scapa’ li mègghiu mègghiu
àgghiu, menta, tant’uègghiu
la granàta sistimata
pi’ passari la virnàta.

Stu paisi è furtunàtu
c’ogni cosa c’ha chiantàtu
quando po’ ti l’hà mangiàtu
pari c’hà risuscitatu.

Sia ca fo’ ’na prufizìa
c’allu mundu li ticìa:
“Non ci sta nienti ti mali
ci Misciagni è cchiù spiciàli”.

Manue' accettiamo la licenza poetica.

Lu carciofu a Misciagni, comu Santu sia sia, si chiama scarcioppula.

(Tolleranza zero)