L'acqua alli muerti
L’acqua alli muerti
Cè trasìi allu Campusantu,
n’àtru picca cu mi spantu,
veddi all’ànguli ppinduti
porta acqua alli chiaùti.
“Sapi cè s’hannù sunnatu,
- iu pinzai, mienzu stunàtu-
fannu tanti cosi stuèrti,
cè hann’ambèviri li muerti ?”
“No!- mi tissi lu uardiànu-
No’ ti sembra ccussì stranu,
puè purtà acqua alli fiuri
ti pizzienti e di signuri.
Nienti cchiu’ acqua ti casa,
‘ntra l’urzulu rasa-rasa,
basta minti ‘na to’ liri
e ccussì ti puè sirvìri.
L’ìnchi t’acqua alla funtana
e ‘na bona sittimana
fiuri e chianti viti tisi
e sparàgni li turnìsi.”
Poi, pinzài intra ti mei,
senza picci né pilèi,
all’anziani, ormai malati
e di pròstata curati.
“’Ntra la villa e ‘ntra li chiazzi,
senza fari spesi pazzi,
cè sarebbi casa mali
ci ppindìunu to’ rinali ?”
