Appena mi corcu, penzu allu Natali … altra composizione di Emanuele Castrignanò per il Natale.

Quandu la sera, stancu ti fatia,

mi va’ corcu ‘ntra lu liettu mia,

‘ppoggiu l’acchiali ‘ntra lu tiraturu,

stutu la luci, mi piaci stà allu scuru.

Prima cu dormu, penzu, a motu mia,

a quantu nd’era tittu lu Mmissia,

vinendu ‘n terra la notti ti Natali

‘ntra ‘nu mundu ritottu propria mali.

Vèsciu tivèrsu, pari tuttu stranu:

li cristiani tinùti manu-manu,

ucuàli ti lingua e di culori,

comu l’è criàti lu Signori.

Regna la paci, no’ sparunu cannuni,

tutti cuntiènti, li crandi e li vagnuni.

No’ si mori ti fami, ti viulenza,

nisciunu ti tirìtti resta senza.

‘Nc’è nu mundu ddò simu tutt’ ucuàli,

tuttu lìmputu, puru senz’acchiàli,

senza patruni e senza sfruttamentu,

senza cumàndu o ‘nu maltrattamentu.

Quantu è bellu, spittandu la nuttata

cu ti suènni, a menti ddiscitata,

‘nu mundu ccussì chinu ti culùri,

e tutti ‘mbrazzati li frati e li sulùri.

Nienti ssurdati, mancu sintinelli

ma la luci ti la luna cu li stelli

ca ndi ‘llùmina ‘nu mundu trasfurmatu,

mi ddèsciutu e... com’èra l’agghi’acchiàtu.

di Emanuele Castrignanò